KATIBA IPINGE TALAKA KWA WANANDOA

TUME ya Mabadiliko ya Katiba imeombwa kuhakikisha kuwa Katiba mpya inawekwa kipengele cha kupiga marufuku talaka nchini.

Sambamba na hilo, imependekezwa kuwa Katiba ikataze watumishi wa Marais, Mawaziri Wakuu na wa Makamu wa Rais waliostaafu kuendelea kulipwa na serikali. Akitoa maoni katika mkutano wa kukusanya maoni kuhusu Katiba mpya katika Kata ya Mpitimbi, wilayani Songea mkoani Ruvuma, Alandus Mpiyi (61) alisema watu wamekuwa hawamheshimu Mungu kwa kupeana talaka ovyo. Mpiyi alisema kila kukicha kumekuwa na talaka zinazozidi idadi ya watu wanaooana na hivyo heshima hiyo kupotea na kupendekeza Katiba mpya iweke bayana amri ya kupiga marufuku talaka. Alipoulizwa na Mwenyekiti wa Tume ya Mabadiliko ya Katiba, Jaji Joseph Warioba aliyekuwepo mkoani humo kwa tathimini ya mchakato kupitia sehemu ya Tume iliyoko mkoani hapa kuwa dini zote zinatambua talaka iweje Katiba ipinge, Mpiyi alisema: “Hata kama serikali inatambua hilo, ndio maana tuko hapa kutoa maoni ya Katiba mpya si ya zamani, hao wanaotaka kuachana, walioanaje? Nani aliwalazimisha kuoana mpaka sasa wanalazimisha kuachana, hakuna ruhusa hiyo, ipigwe marufuku kabisa”. Alipendekeza iwekwe kwenye Katiba mpya ili kila dini, utamaduni na mtu yeyote alazimike kuheshimu amri hiyo na kuifuata ili kuweka heshima kwa taifa. Kuhusu kulipwa watumishi wa viongozi wa kuu wa serikali waliostaafu, wakiwemo madereva, walinzi na watumishi wa ndani, Benedict Haule (28) alipendekeza kuwa Rais, Makamu wa Rais na Waziri Mkuu waliostaafu, waondolewe malipo kwa watumishi wao.