JE UNGEPENDA JINA GANI KUINGIA KWENYE KOMBE LA DUNIA 2014

Kwa ajili ya Fainali za Kombe la Dunia za Mwaka 2014 zitakazochezwa huko Brazil, yamependekezwa Majina matatu, yote yana asili ya Kike, na Mashabiki Duniani kote wamepewa nafasi kutoa chaguao lao.

JE UNAMPENDA NANI: Carnavalesca, Bossa Nova au Brazuca??

Uchaguzi huu wako ni wazo la Kampuni ya Adidas ambayo ndio watengenezaji wa Vifaa rasmi kwa ajili ya Fainali za Kombe la Dunia za Mwaka 2014 na wao watatengeneza Mpira maalum utakaochezewa kwenye Fainali hizo na sasa wapo kwenye mchakato wa kuupa Jina Mpira huo maalum.

Adidas wamependekeza Majina matatu, Carnavalesca, Bossa Nova au Brazuca, yote ni Majina, maneno ya Kireno, na yote yana mizizi ya Kike, na hilo linalingana na falsafa ya Brazil kuwa Mpira ni kama Mwanamke, inabidi uubembeleze na kuutunza.

Carnavalesca ni neno linalomwelezea Mtu anaetaka kushiriki au anaeshiriki kwenye zile sherehe asilia za huko Brazil ‘Carnival’ ambazo Watu hupita Mitaani wakipiga ngoma, kucheza na kuimba mithili ya ‘Mdundiko’ wa Bongo.

Jina la Bossa Nova linahusu Muziki wa Jazi, Samba, ambao uliibuka huko Rio de Janeiro na kutapakaa kote Duniani kuanzia Miaka ya 1950 na 1960.

Brazuca ni neno la mtaani na la utani likimaanisha Wazalendo wa Brazil na hili limewekwa ili kuonyesha msisitizo wa asili ya Raia wa Brazil.

Huu mtindo wa kutoa Majina kwa Mipira inayotumika kwenye Fainali za Kombe la Dunia ulianza kwenye Fainali za huko Mexico Mwaka 1970 na Mpira wake ukaitwa Telstar.

Majina mengine ya Mipira ambayo yatakumbukwa ni Tango wa Fainali za Argentina Mwaka 1978, Azteca wa Mexico 1986 na Jabulani wa Afrika Kusini Mwaka 2010