WAANDISHI WA HABARI WAENDELEA KUHAMASISHWA KUFUATA MAADILI YA KAZI

ANGELICA SULLUSI,Kyela,

WAANDISHI wa habari nchini wametakiwa kujikita kwa kufuata madili ya taaluma kwa  kutangaza na kuandika habari zenye tija kwa jamii ambazo zinaleta uwiano  sawa kwa jamii nzima hususani kwa habari za wanawake.

Hayo yamesemwa na Mratibu wa semina kwa  waandishi wa habari za radio za jamii Rose Haji katika semina ya siku saba kwa wanahabari iliyolenga kuwajengea uwezo wa kutangaza na kuandika habari za kijamii iliyofanyika jana Wilayani Kyela.

Amesema kuwa kwa kipindi kirefu sasa wanawake wamekuwa hawasikiki kabisa katika vyombo vya habari wakati na wao wana mambo mengi ya kuzungumzia.

Aidha,amesema kuwa katika tafiti mbalimbali zilizofanywa kati  ya mwaka 2003 na 2010 na mpango unaoitwa Mahusiano ya Jinsia (gender links) kwa kushirikiana na MISA ulibaini asilimia 17 ya vyombo vya habari vinatangaza habari za wanawake pekee.

Mafunzo hayo  yanaendeshwa na UNESCO  kwa ufadhili wa shirika la SIDA toka nchini Sweeden ambao ni mradi wa miaka mitatu mfululizo kwa radio za jamii tisa nchini.