MAFISADI WAJIPANGA KUMNG'OA KIKWETE UENYEKITI CCM TAIFA

MJUMBE wa Mkutano Mkuu wa Chama Cha Mapinduzi Taifa ameibua tuhuma nzito na kusema kuwa kuna mpango mchafu unaosukwa kwa lengo la kuhakikisha Mwenyekiti wa Taifa Rais Jakaya Kikwete anang’olewa nafasi hiyo kwa kupigiwa kura za hapana.

Akizungumza na waandishi wa habari Dodoma jana, Mjumbe huyo Agustino Matefu alisema kuwa wamegundua baadhi ya vipeperushi ambavyo vitasambazwa siku moja kabla ya uchaguzi na kuwataka wajumbe wa Mkutano Mkuu wa Taifa kutounga mkono uchafu huo na uhuni unaoongozwa na watu wachache kwa maslahi yao binafsi.

Mmoja wa vipeperushi hivyo ambavyo gazeti hili lina nakala yake kilikuwa Kimeandikwa: “Ndugu Mjumbe wa Mkutano Mkuu wa Taifa, Chama chetu kinayumba eti kwa pamoja tumpunguzie mzigo mheshimiwa Rais kwa kumvua kofia moja ya Uenyekiti, kwa pamoja tutashinda piga kura ya hapana kwake,” kilisema moja ya kipeperushi hicho chenye nembo ya Chama Cha Mapinduzi.

Alisema kuwa moja ya vipeperushi hivyo kilikutwa Dodoma Hotel ambapo Hussein Bashe na wenzake watatu walipokuwa kwenye kikao usiku wa kuamkia jana na walifika hapo baada ya kupata taarifa ya kikao hicho na kufuatilia.

Aliwataja wengine hao kuwa Beno Malisa, Martine Shigela na Fred Lowassa. Alipohojiwa Bashe alikanusha kuhusika na kampeni za kumng’oa Kikwete wala vipeperushi hivyo na kusema kuwa hizo ni fitina za kisiasa.

Mjumbe huyo wa mkutano mkuu alisema kuwa, mafisadi wametenga jumla ya shilingi bilioni tano kwa lengo la kupitisha wajumbe wao wa NEC ambao watasimamia maslahi yao ya Urais.

Alisema kuwa kuna haja ya kukataa na kupinga mipango michafu kama hiyo yenye lengo la kukifedhehesha chama na kukitia aibu na kuonekana kuwa ni chama cha watu fulani.

Mjumbe huyo wa mkutano mkuu alisema kuwa yuko tayari kutoa ushahidi kutokana na hayo anayoongea kwani ana ushahidi nayo

Chanzo.Jaizmela leo.