Uganda kuondoa majeshi yake nchini Somalia

Serikali ya Uganda imeazimia kuvitoa vikosi vyake nchini Somalia. Patrick Amama Mbabazi Waziri Mkuu wa Uganda ameliambia bunge la nchi hiyo na kuongeza kuwa, hatua hiyo imechukuliwa ikiwa ni radiamali kutokana na tuhuma zilizotolewa na Umoja wa Mataifa kwamba nchi hiyo inawasaidia zana za kivita waasi wa March 23 wanaopambana na serikali ya Jamhuri ya Kidemokrasia ya Kongo. 

Amama Mbabazi ameongeza kuwa, katika hali ambayo wanajeshi wa Uganda chini ya mwamvuli wa vikosi vya kulinda amani vya Umoja wa Afrika wako nchini Somalia na baadhi yao wamepoteza maisha yao kwa shabaha ya kupambana na makundi ya waasi nchini humo, huku Umoja wa Mataifa unadiriki kutoa madai na tuhuma zisizo na msingi kwamba Kampala inawasaidia zana za kijeshi waasi wa March 23. 

Timu ya wataalamu wa Umoja wa Mataifa ilitayarisha ripoti ya kurasa 44 na kuzituhumu nchi za Rwanda na Uganda kwa kukiuka vikwazo vya Umoja wa Mataifa kwa kuwapelekea silaha kwa waasi wa kundi la M23.