UBAKAJI WAENEA MIJINI NA VIJJIJINI

Serikali imekiri kuenea kwa tatizo la ubakaji katika maeneo ya mjini na vijijini, na kuahidi kutafuta njia ya kukabiliana nalo ikiwa pamoja na kutoa elimu kwa wananchi.

Akizungumza jijini Dar es Salaam kwa niaba ya Waziri wa Maendeleo ya Jamii Jinsia na Watoto, Sophia Simba, kwenye Tamasha la Tanzania Alliance People’s Organization (TAPO), Naibu Katibu Mkuu wa wizara hiyo, Anna Maembe, amesema kuwa ubakaji umekithiri hasa kwa watoto wadogo.

Amesema kuwa utandawazi ni miongoni mwa sababu kubwa zinazochangia ubakaji na ulawiti, kutokana na kuongezeka kwa matumizi mabaya ya mitandao ambapo inachangia ongezeko la vishawishi vya ubakaji.

Hata hivyo, aliwataka watoto kutoogopa vitisho wanavyopewa kwa kuwa wanapaswa kutoa taarifa za matukio ya ubakaji yanayowakumba.

Naye Mwenyekiti wa TAPO, Felista Nyakato amesema kuwa, shirika hilo limeanzishwa kwa lengo la kukomesha na kutokomeza changamoto za kijamii zinazowakabili watoto na vijana.