WAZIRI MWAKYEMBE ACHANGAMKIWA NA JUMUIYA YA WAINGEREZA NA WATANZANIA LONDON

 Waziri wa Uchukuzi, Dk Harrison Mwakyembe akiendelea kuvutia maongezi mazito hata baada ya kutoa hotuba

 Dokta Hamza na wenzake katika chai baada ya semina

 David Luhanga (kushoto) na Rajab Juma wamezama ndani ya mjadala wa katiba na usafiri.

 Sista Lucia wa kanisa la Wakatoliki aliyeshaishi Tanzania akiuliza maswali kuhusu ajali ya meli Zanzibar wakati wa mkutano huo  wa Central Hall, Westminster.

 Mtayarishaji wa mkutano, Andrew Coulson -ambaye ni mhadhiri wa chuo kikuu cha Birmingham- akipiga gumzo kwa chai na mmoja wa wahudhuriaji.

 Waziri Mwakyembe akihutubia semina

 Dk Mwakyembe akisikiliza hoja mbalimbali kwa makini kutoka kwa wananchi  ughaibuni wanaolilia shida za usafiri Bongo.

 Mkurugenzi wa Kituo cha Biashara Tanzania London, Yusufu Kashangwa, akibadilishana mawazo na Waziri, huku wadau  wakisikiliza kwa uchu

 Mjadala uliomzunguka Waziri

Aseri Katanga, anayeendesha kituo cha kusafirisha tarakilishi (kompyuta) kwa wanafunzi wa Bongo toka Uingereza akiwa mjadalani na Billy Mwangamilo na George Kantande.

Picha zote na Freddy Macha

 

Habari na Picha za Freddy Macha 

 Waziri wa Uchukuzi, Dk Harrison Mwakyembe amewahakikishia Watanzania na wageni kwamba jitihada zitaendelea kufanywa na serikali kuboresha usafiri Bongo.

 

 Akiongea mjini London juzi katika “mkutano wa mwaka” wa jumuiya ya Watanzania na Waingereza (Britain-Tanzania Society) na Mfuko wa Udhamini wa Maendeleo (Tanzania Development Trust), alisema bado pana mengi sana ya kufanya toka ateuliwe miezi minne iliyopita. 

 

Waziri Mwakyembe vile vile alifafanua kuhusu majadiliano ya katiba mpya inayotegemewa kutajwa mwaka 2015. Akijibu maswali toka kwa Wazungu na Watanzania waliohudhuria kikao Central Hall, Westminster, hatua chache karibu na Ikulu ya Uingereza (Whitehall), Mwakyembe ambaye ni mbunge wa Kyela, alifahamisha kuwa moja ya tatizo lililojaribu kutafutiwa ufumbuzi karibuni ni kuzorota kwa bandari ya Dar es Salaam. 

 

Alisema Wizara ilibidi kubadili uongozi wa bandari hiyo baada ya ripoti ya kimataifa iliyoichamba Dar kuwa moja ya bandari mbaya duniani zisizotekeleza kazi zake sawasawa. “Bandari ya Dar es Salaam ina uwezo wa kulisha uchumi wa nchi nzima ikiendeshwa vyema,” aliueleza mkutano uliomsikiliza kwa makini. 

 

“Tumezungukwa na nchi nyingi zisizo na bahari ambazo zinatutegemea kusafirisha mizigo yake. Kwa hiyo basi, wizara ya uchukuzi ikilala na taifa zima linalala.” Akitoa mifano kadhaa ya hali mbaya ya usafiri nchini, Dk Mwakyembe aliongelea kwa hamasa na matumaini kuhusu ujenzi wa barabara na reli mbalimbali. 

“Tuna mengi bado ya kufanya. Reli zetu kubwa ni za kale sana. Ya toka Dar hadi Kigoma na Mwanza mathalan ilijengwa enzi za Wajerumani kwa hiyo yabidi kutengenezwa upya.” 

 

Alitoa mfano wa ufumbuzi wa tatizo la msongamano wa magari jijini Dar es Salaam ambapo pesa zilizopangwa kurekebisha njia nyingine mikoani zimetumika kurahisisha usafiri kati ya Ubungo hadi mjini na Makanga hadi Kurasini ( kwa nauli nafuu ya shilingi 500) na muda mfupi wa dakika ishirini. Akiwaelemisha waliokuwepo kuhusu maendeleo ya kisiasa Tanzania, Waziri alisema mjadala unaosisimka nchini sasa hivi unahusu mageuzi ya katiba ambayo “inatakiwa ioane na maisha ya karne ya 21.” 

 

Akifafanua historia ya katiba Tanzania kwa lugha  fasaha ya Kiingereza, Waziri huyu ambaye ni mtaalamu wa sheria, alitaja miaka muhimu kuwa 1961( baada ya Uhuru),1963 (Ujenzi wa taifa jipya), 1965 (Muungano), 1977 ( kuzaliwa CCM) kisha 1983 na kupitishwa sera ya vyama vingi mwaka 1992. Maswali mengi yaliulizwa kuhusu usafiri na ulaji rushwa uliochangia sana uzorotaji unaoendelea kusababisha ajali kubwa na za kutisha bara na visiwani. 

 

Na hata baaada ya hotuba rasmi, wakati wa kupata chai, wananchi na wageni waliendelea kumsonga na kumzunguka Waziri wakimjuza kwa maswali moto moto. Kiongozi hakuonyesha dalili zozote za kuchoshwa na shauku hiyo. 

 

Akimshukuru Waziri, mmoja wa maofisa wa Jumuiya ya Waingereza na Watanzania, Bi. Valerie Leach (anayeendesha shughuli za kielimu Bongo) alisema inawapa wageni moyo kwamba Tanzania inao viongozi wanaokinzana na rushwa na ufisadi kama ilivyokuwa enzi zile za Mwalimu Nyerere. Mapema Dk Harrison Mwakyembe alikaribishwa kwa maelezo ya namna alivyoshaokoka kufa mara mbili (ajali ya gari na maradhi ya ngozi) kutokana na msimamo wake kujaribu kuendeleza jamii. 

 

Mapema mkutano ulielezwa miradi mbalimbali inayoendelezwa na Mfuko wa Udhamini wa Maendeleo (Tanzania Development Trust). 

 

Kati ya miradi hiyo ni kukarabatiwa nyumba ya wazee Tanga, uendelezaji wa viwanda vidogo vidogo 37 bara na visiwani, maendeleo ya vijana wasiokuwa na kazi na vifaa vya wafanyakazi wa hospitali ya Lindi kuepuka kipindupindu.

 

 Akielezea mapenzi yake kusaidia maendeleo Tanzania, mwanamakati wa Jumuiya ya BTS, Julian Marcus alisema jitihada za wanachama zinatokana na michango binafsi na kujitolea bila malipo yeyote. Shughuli hii ya Jumamosi vile vile ilihudhuhuriwa na Balozi wetu Uingereza, Mheshimiwa Peter Kallaghe na Mkurugenzi wa kituo cha biashara London, Yusufu Kashangwa. Jumuiya ya BTS ilianzishwa mwaka 1975 na Waingereza na Watanzania kuendeleza mahusiano kati ya nchi hizi mbili. Inaongozwa na Rais wa zamani, Ali Hassan Mwinyi. 

 

Kikao kijacho cha BTS kitafanyika chuo kikuu cha lugha za Kiafrika na Asia (School of Oriental and African Studies-SOAS) London kujadili demokrasia na vyombo vya habari Tanzania, tarehe 6 Desemba.